Labels

rp

Blogging Tips 2017

திருமங்கலம் அருகே வகுப்பறை வசதி இல்லாததால் மரத்தடியில் படிக்கும் மாணவர்கள்

திருமங்கலம்: திருமங்கலம் அருகே அரசு உயர்நிலைப்பள்ளியில் வகுப்பறை வசதி இல்லாமல் மரத்தடியில் மாணவர்கள் படித்து வருகின்றனர்.
திருமங்கலம் அருகே டி.அரசப்பட்டியில் அரசு உயர்நிலைப்பள்ளி உள்ளது. இப் பள்ளியில் அரசப்பட்டி, வெயிலுகந்தாபுரம் உள்ளிட்ட சுற்றுவட்டார பகுதிகளை சேர்ந்த 150க்கும் மேற்பட்ட மாணவ, மாணவியர்கள் படித்து வருகின்றனர். 10 ஆசிரியர்கள் உள்ளனர். கடந்த 2010ல் உயர்நிலைப்பள்ளியாக தரம் உயர்த்தப்பட்டது. ஆனால் போதுமான கட்டிட வசதிகள் இல்லை.
இதனால் உயர்நிலைப்பள்ளியின் வகுப்புகள் அருகே துவக்கப்பள்ளி மற்றும் ஊராட்சி அலுவலகத்தின் ஒரு பகுதியில் இயங்கி வருகின்றன. 10ம் வகுப்பு துவக்கப்பள்ளியிலும், 6, 8, 9ம் வகுப்புகள் துவக்கப்பள்ளியின் பழைய கட்டிடத்திலும், 7ம் வகுப்பு ஊராட்சி மன்ற அலுவலகத்திலும் செயல்படுகிறது.
போதுமான அளவுக்கு கட்டட வசதி இல்லாததால், பல நேரங்களில் மரத்தடியில்தான் வகுப்புகள் நடைபெறுகிறது. இதனால் மாணவ, மாணவியர் அவதிக்குள்ளாகின்றனர்.
இதுகுறித்து அரசப்பட்டி கிராம மக்கள் கூறியதாவது: எங்கள் ஊர் நடுநிலைப்பள்ளி, உயர்நிலைப்பள்ளியாக தரம் உயர்ந்தது கண்டு மகிழ்ச்சியடைந்தோம். ஆனால் இட வசதி இல்லாததால், கிராமத்தின் அய்யனார் கோயில் அருகே காலியிடத்தில் உயர்நிலைப்பள்ளிக்கு புதிய கட்டிடம் கட்ட முடிவு செய்யப்பட்டது. ராஷ்ட்ரியா சிக்ஷா அபியான் திட்டத்தின் கீழ் ரூ.50 லட்சம் ஒதுக்கீடு செய்யப்பட்டது. ஆனால் ஒரு சிலர் முறைகேட்டில் ஈடுபடவே பணிகள் பாதியில் நிறுத்தப்பட்டன. அத்துடன் பணிகள் முடங்கி நின்று விட்டன. இதனால் உயர்நிலைப்பள்ளி மாணவ, மாணவிகள் பாதிக்கப்பட்டுள்ளனர்.
போதுமான இடவசதி இல்லாததால் ஊராட்சி நிர்வாகம் ஏற்பாடு செய்து தந்த ஊராட்சி கட்டிடத்தில் 7ம் வகுப்பும், துவக்கப்பள்ளி கட்டிடத்தில் பிற வகுப்புகளும் இயங்குகின்றன. மாவட்ட நிர்வாகத்திற்கு பலமுறை தெரிவித்தும் நடவடிக்கை இல்லை’ என்றனர். இந்தப்பள்ளிக்கு புதிய கட்டிடங்கள் உடனடியாக கட்டித் தரவேண்டும் என்பது இப்பகுதி சமூக ஆர்வலர்களின் எதிர்பார்ப்பாக உள்ளது.
மழை பெய்தால் விடுப்பு
மாணவர்கள் மகேஸ்வரன், சரண்யா கூறுகையில், ‘‘கட்டிட வசதி இல்லாததால் மழை காலங்களில் 6 முதல் 9 வகுப்பு வரை விடுமுறை விடப்படுகிறது. 10ம் வகுப்பிற்கு மட்டும் துவக்கப்பள்ளியில் வகுப்புகள் நடத்தப்படுகின்றன. இதனால் எங்கள் கல்வி பாதிக்கிறது. மேலும், ஓட்டை உடைசல் கட்டிடத்தில் நாங்கள் படித்துக் கொண்டிருக்கிறோம். இந்தக் கட்டிடம் எப்போது இடிந்து விழுமோ என அச்சத்துடன் படித்து வருகிறோம்,‘‘ என்றனர்.

No comments:

Post a Comment