Labels

rp

Blogging Tips 2017

ஜிப்மர் மருத்துவப் படிப்புக்கான நுழைவுத் தேர்வு முடிவு வெளியீடு

புதுச்சேரி ஜிப்மர் மருத்துவப் படிப்புக்கான நுழைவுத் தேர்வு முடிவுகள் வியாழக்கிழமை வெளியாகின. இதில், ஆந்திர மாநிலம் செகந்திராபாதைச் சேர்ந்த மாணவர் கனூல் ரமேஷ் சந்திகர் 174 மதிப்பெண்கள் பெற்று முதலிடம் பிடித்துள்ளார்.
புதுச்சேரியில் உள்ள ஜிப்மர் மருத்துவக் கல்லூரியில் எம்பிபிஎஸ் படிப்பில் உள்ள 150 இடங்களுக்கான நுழைவுத் தேர்வுகள் கடந்த 2-ம் தேதி நாடு முழுவதும் 14 மையங்களில் நடைபெற்றன.
இதில், 52,298 பேர் பங்கேற்று தேர்வெழுதினர். விண்ணப்பித்தோரில் இது 75.36 சதவீதம். கடந்த ஆண்டு 29,108 பேர் பங்கேற்றிருந்தனர்.
இதன் முடிவுகள் வியாழக்கிழமை வெளியாகின. இதில், பொதுப் பிரிவு 51, ஓபிசி 27, எஸ்.சி. 15, எஸ்.டி. 8, புதுச்சேரி பொது 23, புதுச்சேரி ஓபிசி 11, புதுச்சேரி எஸ்.சி. 6 மற்றும் வெளிநாடு வாழ் இந்தியர்களுக்கான இடங்கள் 5, மத்திய அரசின் பரிந்துரைக்கு 4. இதில் உள் ஒதுக்கீடாக, மாற்றுத்திறனாளிகளுக்கு 4 இடங்களுக்கு மாணவர்கள் தேர்வு செய்யப்பட்டுள்ளனர்.
ஆந்திர மாநிலம் செகந்திராபாத் மாணவர் கனூல் ரமேஷ் சந்திகர் 174 மதிப்பெண்களுடன் ஓபிசி பிரிவில் முதலிடம் பிடித்துள்ளார். மற்ற பிரிவில் முதலிடம் பிடித்தவர்கள் விவரம்:
பொது பிரிவில், பெங்களூர் ஹேமந்த் அமர்தீப் சந்தூர் 172, ஹைதராபாத் டிஎன்சி.பிரணவ் 172.
எஸ்.சி. பிரிவில் ஆந்திர மாநிலம் மேற்கு கோதாவரி பாயி சொப்னா 161, எஸ்.டி. பிரிவில் மணிப்பூர் இம்பால் கதிபிரி நீலியா 146.
பொது மாற்றுத்திறனாளி பிரிவில் கோல்கத்தா அனுபாப் பட்டாச்சார்யா 169.
புதுச்சேரி யூனியன் பிரதேசம்: பொதுப் பிரிவில் எம்.கார்த்திகேயன் 166, ஓபிசி பிரிவில் டி.சுஷ்மா 164, எஸ்சி பிரிவில் இ.மோனிஷா பிரியா 133 ஆகியோர் முதலிடம் பிடித்துள்ளனர்.
இத்துடன் பொதுப்பிரிவில் 174 முதல் 160 மதிப்பெண்கள் வரை எடுத்திருக்கும் 167 மாணவ, மாணவிகளின் பெயர், ஓபிசி பிரிவில் 174 மதிப்பெண்கள் முதல் 153 மதிப்பெண்கள் வரை பெற்ற 99 மாணவ, மாணவியரின் பெயர், எஸ்சி பிரிவில் 161 மதிப்பெண்கள் முதல் 140 மதிப்பெண்கள் வரை எடுத்த 66 பேரின் பட்டியல், எஸ்.டி. பிரிவில் 146 மதிப்பெண்கள் முதல் 129 மதிப்பெண்கள் வரை எடுத்த 36 மாணவர்களின் பட்டியல், மாற்றுத்திறனாளிகள் பிரிவில் 169 முதல் 110 வரை மதிப்பெண்கள் எடுத்த 29 மாணவர்களின் பட்டியல், வெளிநாடு வாழ் இந்தியர் பிரிவில் 166 முதல் 140 வரை மதிப்பெண்கள் எடுத்த 30 மாணவர்களின் பட்டியல் ஆகியவற்றை ஜிப்மர் வெளியிட்டுள்ளது.
புதுச்சேரி யூனியன் பிரதேசத்தைச் சேர்ந்த மாணவர்களுக்கான தனி ஒதுக்கீடாக, 166 முதல் 129 மதிப்பெண்கள் பெற்ற புதுச்சேரி மாணவர்கள் 59 பேர், ஓபிசி பிரிவில் 164 முதல் 118 வரை மதிப்பெண்கள் பெற்ற 47 பேர், எஸ்சி பிரிவில் 133 முதல் 107 வரை மதிப்பெண்கள் பெற்ற 16 பேர் பட்டியலையும் ஜிப்மர் வெளியிட்டுள்ளது.
வெற்றிபெற்ற மாணவர்களுக்கான கவுன்சலிங் ஜூலை 11 மற்றும் 12-ம் தேதிகளில் ஜிப்மரில் நடைபெறுகிறது. மேலும் விவரங்களுக்கு: www.jipmer.edu.in.

No comments:

Post a comment